على قد لحافك مد صباع رجلك الصغير

اردت ان اعرض عليكم موضوعا منتشرا كثيرا بيننا ان لم يكن فينا في بعض
الاحيان


هذا الموضوع خطيير جدا ولكننا لا نعطيه اي اهتمام وقد يمر علينا كثيرا مرور
الكرام


ولا نعطي لانفسنا ولو حتى بضعة دقائق للتفكير فيه وايجاد حل لمن يستخدموه
ويمارسوه بل في اغلب الاحيان نكتفي بالسخرية والضحك عليهم.


هذا الموضوع هو عبارة عن عادة في كثير من الناس والتي نفسرها بمقولة(أنا لا
اكذب ولكني اتجمل)


وكالعادة اسمحو لي ان اكسر حاجز اللغة العربية الفصحى حتى استطيع التحدث
لان النقد الساخر (بيحب الحرية)


الانسان اللي بيعمل كده بنصفه بصفات مختلفه تؤدي لنفس المعنى يعني نقول ان
الانسان ده (هتاش) او( بيفتي دايما) اوفي الصعيد يسمى( قباب) او نقول ان الشخص ده
(بيفتح صدره) او (بيحب يغني علينا كتيير)
او (هجاص) او خياله واسع وهكذا
وهكذا وفي النهاية كل الطرق تؤدي الى روما البلد.


فتلاقي كثير بيعمل الموضوع ده بغرض الظهور بصورة جميلة امام الاخرين وهوعلى
اقتناع تام ان الموضوع ده هوه اللي هيخليه في نظر الناس الشخص المثالي المحترم لا وايه من كتر اعتياده
للموضوع بيعيش الدور ويصدق نفسه فعلا ويبدا يتعامل على اساس كلامه اللي بيقوله
للناس ويخاف جدا لو حد شافه واكتشف حقيقته


قابلت كتيير من النوعيات دي اللي بتحب تعييش بلاش علينا والغريبة انهم
بيبقوا معتقدين جواهم ان احنا مش بنحترمهم وده طبعا مش بيكون حقيقي وده اللي
بيخليهم يعيشوا علينا زي مابنقول


فتلاقي واحد يقلك... ياخي الواحد مش عارف يعمل ايه ...... تقله ليه ياعم خير طبعا انت فاكره عنده
مشكلة وعايز تساعده ....... تفاجا انه بيقلك اصلي ياخي زهقت من
العربيات الواحد كل اسبوعين يغيرله عربية ومش عارف كده مش بقتنع بسهولة بس
هعمل ايه ااهو الواحد عايش وخلاص...


ياسلااااااام ياد انت ... المشكلة انك انت عارف انه امكانياته اساسا متسمحش
باللي بيقوله ولا حتى باللي اقل من اللي بيقوله بس طبعا بتسمعله.


ولا الاخ اللي تتكلم ومعاه وانت
بتشكيله حالك يقلك بص متقلقش انت بس سيبلي الموضوع ده وملكش دعوة عارف فلان
الفلاني عضو مجلس الشعب ......


ايوه طبعا هو في حد ميعرفهوش


اهو ده حبيب هارتي ده معايا دايما
كل يوم عارف على كده لسه ماشي من هنا من خمس دقايق بس لو قدمت شوية كنت عرفتك بيه
لالالالا اعتبر موضوعك خلصان.


وطبعا انت تفرح وتحط في بطنك شادر بطيخ وتيجي تتصل بيه تتطمن تلاقيه يقلك
اصلي والله مشغول قوي او اصل الراجل الايام دي في مؤتمر بس اول مايوصل اعتبر
موضوعك خلاص او يقلك يباشا عيب عليك كلمتهولك بس هيه العملية هتاخد وقت زي مانت
عارف وهكذا طبعا لغاية في النهاية متكتشف ان البطيخ كله اللي حطيته في بطنك اقرع
وان الراجل ده بيهتش عليك وانك لوكنت استثمرت الوقت اللي ضيعته في اعتمادك على
الشخص ده في انك سعيت وعملت اللي تقدر عليه
ساعتها اكيد كنت هتكون احسن.


وتلاقي واحد معاك في الشغل وبتتكلم
معاه وانت طبعا طالع عينيك ومش عارف مرتبك تصرفه على ايه ولا ايه عليك التزامات
وعليك اقساط وعايز تدخل جمعية وعايز وعايز ومش عارف اساسا هيبقالك ايه تصرف منه
على نفسك وتبقى شايل الهم والطين وتيجي تقله وتشكيله عشان يشاركك همك كنوع من
تخفيف حدة المشكلة على اساس انكم شغالين مع بعض وفي نفس المشكلة. تلاقيه بكل
ببساطة يقلك ياراجل هوه انت فاكر ان انا محتاج الشغل ده انا اساسا جاي اشتغل هنا بس عشان اضيع وقت بدل
مانا قاعد في البيت اهو اديني بتسلى ده الفلوس اللي الواحد بيطلعها للعمال اللي
عندينا في الارض تعيش 100 شركة زي اللي احنا شغالين فيها دي.


ولا اللي يحكيلك على بطولاته في
انه يفهم كل حاجة في الدنيا وانه محدش يقدر يجاريه في اي حاجة وانه واخد اعلى
الشهادات المعتمدة من اكبر الجامعات العالمية وهوه اساسا مكملش تعليمه.


وهكذا وهكذا كتير من المواقف اللي الواحد مر بيها شخصيا مع ناس زي كده واكيد كلنا مرينا بالموضوع ده


بس اكتر موقف بيضحكني كل ماافتكره انه كان فيه واحد اتعرفت عليه ايام
الجامعة وكان من الطلبة المعيدين في كلية الحقوق اللي دخل مع دفعته بتاعة ثانوي
ووقع منهم في السكة بتاع عشرة او 11 سنة .
طبعا هوواضح عليه جدا انه سنه كبيير. وفي
مرة ناس بلدياته كان جايين يسالو عنه وهو مكنش موجود ساعتها. وانا اللي
استقبلتهم وبديهي اول سؤال ليا من بلدياته بعد الترحيب واخذ واجب الضيافه
.


قلي انت على كده صاحب حجاج بيه
المحامي؟؟


انا سمعت كلمة حجاج بيه المحامي دي وبصراحة مقدرتش امسك نفسي من الضحك لاني ترجمت على طول ان الباشا مفهم الناس عنده
في البلد انه محامي وان شغله في بلد تاني وانه مشغول جدا في القضايا بتاعته.


والناس ياعيني جايين يشوفوا الباشا اللي هيحللهم مشاكلهم . وطبعا هما
ميعرفوش انه مش قادر يحل مشاكله وبيتسنكح على قفايا انا.


وعشان مطولش عليكم انا كتبت الموضوع ده لاني فعلا نفسي الاقي حل للمشكلة دي
احنا ليه لازم نكدب على الناس ونظهر بصورة غير صورتنا عشان فاكرين ان ده هوه اللي هيخيلنا في نظرهم
محترمين وبنسميها تجمل او كذبة بيضة .


وليه بنخترع ونتخيل حاجات ونعيشها بالفعل ونزعل جدا من بعض لوحد قال علينا
حاجة مخالفة للي بنعمله مع ان الحاجة المخالفة دي هي الصح.


ليه الصراحة بقت متعبة والكذب هو اللي بقى اريح.


ليه الاحترام والاعجاب بقى بس للي معاهم عربيات وفلوس وفيلات وبيلبسوا من
افخم المحلات والموديلات.


ليه لما حد يقلنا حقيقتنا ويواجهنا بيها بنزعل منه ولما يضحك علينا ويقول
عكس حقيقتنا نحبه.


ياترى العيب في مين في اللي بيعمل كده ولا في اللي بيصدقه ولا في اللي
بيخليه يستمر على الرغم من علمه انه ده غلط.


وياترى ده الاسلوب دلوقتي المتبع عشان الناس تحترمني؟


وياترى اللي بيعمل كده هيفضل يكدب او يتجمل على حد قوله لغاية امتى؟


ارجو منكم ان تشاركوني اراكم وفعلا محتاج حل للموضوع ده